10 июньдә “Рәйхан” кафесында “Апрель" мөмкинлекләре чикле балаларны тернәкләндерү үзәгенә йөрүчеләр өчен Балаларны яклау көненә багышланган хәйрия чарасы оештырылды. Әлеге чараны ТР МДНнең хәйрия, яшьләр бүлекләре, Гаилә, хатын-кызлар һәм балалар эшләре комитеты, “Ярдәм” фонды үткәрде.
Кафеда балалар һәм аларның ата-аналары өчен бәйрәм программасы һәм табын әзерләнгән иде.
Чарада мөфтинең урынбасары Илдар хәзрәт Баязитов та катнашты. Ул үзенең чыгышында иҗтимагый эшчәнлек алып бару нәзарәтнең төп бурычларыннан берсе икәнне билгеләп үтте. Ул бәйрәмгә килүчеләрнең барысына да рәхмәтләрен әйтте һәм аларга Аллаһы Тәгалә әҗер-саваплар бирсен, ярдәменнән ташламасын дип, теләде.
Бәйрәм программасын Татарстанның атказанган артисты Ренат Вәлиев әзерләде. Чарада балалар клоун, фея кебек әкият геройлары белән бергә биеделәр, уйнадылар, рәхәтләнеп күңел ачтылар. Бәйрәм ахырында балаларга нәзарәт исеменнән бүләкләр өләшенде.
Ата-аналар балаларына бәйрәм ясаган өчен оештыручыларга рәхмәтләрен җиткерделәр.
Фоторепортаж: http://www.dumrt.ru/node/8709
