Мәдрәсәдә район мөселманнары өчен китапханә ачарга телиләр

Буа мәдрәсәсендә яңа уку елына әзерлек бара. Аерым алганда, мәдрәсә хезмәткәрләре көче белән шәкертләрнең  уку һәм  яшәү бүлмәләрендә, ашханәдә, шулай ук уку йорты тирәсендә төзекләндерү эшләре  дәвам итә. Яңа уку елында биредә Буа районы мөселманнары өчен яңа китапханә ачу ниятләнелгән. “Теләгәннәр бу китапханәгә килеп  элек чыккан һәм хәзерге заман дини китаплары белән танышсын, аларны өйләренә алып кайтып укый алсын өчен махсус китапханә булдырырга телибез. Бу мөһим гамәлне тормышка ашыруда ярдәм итәргә теләүчеләр табылса бигрәк тә яхшы булыр иде, чөнки китапханә дини гыйлем таралуга үзе бер зур этәргеч”, - диде мәдрәсә директоры Рәшит хәзрәт.  Хәзерге вакытта китапханәне ачу өчен аның  матди ягын җайлау юллары эзләнә.