3 майда Бөгелмә районы имам-мөхтәсибе Рөстәм хәзрәт Хәйруллин, дәгъват бүлеге җитәкчесе Хәбир хәзрәт Ханов һәм мәгариф бүлеге җитәкчесе Әмир хәзрәт Исмәгыйлев белән берлектә, Әлмәт һәм Урыссу мәдрәсәләренә эшлекле сәфәр кылдылар. Әлеге уку йортларының җитәкчелеге белән җәйге мөселман лагерьларына практика үтүче студентларга кагылышлы мәсьәләләр буенча фикер алыштылар. Очрашу барышында, җәйге лагерьларга кагылышлы мәсьәләләр белән беррәттән, Рамазан аенда эшләнәчәк планнарны да карап үттеләр.
Узган 2011 елда Бөгелмә шәһәрендә дистәләп җәйге лагерьлар оештырылган, 500ләп бала ял иткән. Агымдагы елда лагерьларның саны ягыннан гына түгел, сыйфатын да яңа баскычка күтәрергә планлаштыралар.
