Бүгенге көндә Яңа Чишмә районындагы 11 мәчетнең җидесендә балаларга дини дәресләр бирелә.
8 гыйнвар көнне Акбүре авылы мәчетендә балалар өчен үткәрелгән бәйгедә һәр мәчеттән бишәр бала катнашты. Балалар үзләрен төрле уен-бәйгеләрдә сынады. Иң беренче сынау – балаларның белемнәрен тест ярдәмендә ачыклау булды. Конкурс шулай ук азан әйтү, Коръән сүрәләре һәм догалар уку кебек этапларга да бүлеп үткәрелде. I, II, III урыннар алучыларга һәм барлык катнашучыларга да истәлекле бүләкләр тапшырылды.
Акбүре авылы имамы Хәмзә хәзрәт Шәрифуллин һәм авыл Советы башлыгы Җәүдәт Җәләлетдинов килгән кунакларга үз рәхмәтен җиткерде.
Бәйгене оештыру-үткәрүдә авыл җирлеге халкы, Акбүре мәчете имамы гаиләсе, хуҗалык җитәкчеләре зур тырышлык куйган.
Бәйгедә аеруча зур активлыкны Казандагы “Мөхәммәдия” мәдрәсәсендә укучы студентлар – Гәрәева Гөлүсә һәм Габдрафикова Миләүшә күрсәтте.
42 бала катнашкан бәйгенең чыгымнарын мөхтәсибәт үз өстенә алды.
Яңа Чишмә мөхтәсибәтенең дәгъват һәм мәгълүмат бүлеге
