Нәзарәт тарафыннан 2015 ел “Татар дин галимнәре елы” буларак уза. Шушы уңайдан Югары Ослан мөхтәсибәте агымдагы елны татар дин галимнәрен өйрәнү, пропагандалау, аларның хезмәтләрен халыкка җиткерүне төп эшләрнең берсе итеп билгеләде. 8 апрельдә Югары Ослан мөхтәсибәте үзәк мәчетендә “Ризаэтдин Фәхретдин хәзрәтләренең тормыш юлы” дигән кичә узды. Кичәдә Ослан гимназиясе, урта мәктәп укытучылары, укучылары, мәчет картлары, абыстайлар һәм кунаклар катнашты. Кичәне үткәрүдә Югары Ослан үзәк китапханәсе хезмәткәрләре, мәктәп укытучылары зур булышлык күрсәттеләр. Кичә кичке аш белән төгәлләнде, дип хәбәр итә Югары Ослан мөхтәсибәте.
