Вәлиулла хәзрәт Якуповның “Рамазан. Ураза” дип аталган китабының икенче басмасы дөнья күрде. “Иман” нәшриятында басылган татарча китапның исеме үк аның ни турында икәнен әйтеп тора. Әлеге китапта ураза тотуның мәгънәсе аңлатыла. Моннан тыш, ул ураза тотарга ният итүчеләргә көндәлек кулланма буларак та хезмәт итәрлек басма.
Китап авторы Вәлиулла хәзрәт Якупов ураза тоту тәртипләрен бөртекләп язган һәм киңәшләрен дә биргән. Уразага кагылышлы сорау-җавап бүлеге күпләргә үзләрен борчыган мәсьәләләрне чишәргә булышыр. Китапта Рамазан аенда укыла торган догалар, ният әйтүләр дә урын алган. Шулай ук анда быелгы һәм киләсе елгы Рамазан аена сәхәр, ифтар һәм намаз уку вакытлары күрсәтелгән.
Вәлиулла хәзрәт үзенең китабында Рамазан ае, ураза тоту турында дини күзлектән чыгып кына язмый. Бу дини төшенчәләрнең иҗтимагый әһәмияткә ия булуы турындагы язмалар – яңа басманың үзенчәлеге. Әйтик, аерым бер бүлектә уразаның сәламәтлеккә файдасы турында язылган.
