7 Июль , 2011
Русия президенты Дмитрий Медведев мөфтиләр белән очрашу вакытында Татарстан Диния нәзарәте тәҗрибәсен өйрәнергә чакырган.
Президент тәкъдиме һәрберсе аерым оешма булып эшләп килгән мөфтиятләрнең Казан тирәсендә җыела башлавын аңлатмыймы? Бу уңайдан Татарстан мөфтие Илдус Фәиз “Татар заманы” интернет газетасына интервью бирде.
Президентның Кабарда-Балкар республикасында узган орашуында Русиянең Үзәк Диния нәзарәте рәисе, Баш мөфти Тәлгат Таҗетдин, Чуашстан һәм Мәскәү мөфтие Әлбир Крганов, Мөфтиләр Шурасы рәис Равил Гайнетдин, Татарстан мөфтие Илдус Фәиз, Төньяк Кавказ мөселманнарының Координацион үзәге, РАИС мөфтияте вәкилләре катнашты. Җыелышта мөфти Илдус Фәиз Татарстан Диния нәзарәте эшчәнлеге хакында доклад белән чыгыш ясаган.
- Илдус хәзрәт, ил башлыгы мөфтиләр белән болай гына очрашмый. Очрашуның әһәмияте булдымы?
- Төп әһәмияте – Русия президентының мөселманнарның хәленә кереп, бергәләп экстремизм, терроризмга каршы тору, көрәшү турында сөйләве, бу уңайдан мөфтиләрдә нинди фикерләр бар дип соравы. Очрашуда Татарстан мөфтиятенә зур урын бирелде. Русиянең дүрт мөфтияте белән бер дәрәҗәдә президент янында булдык. Ягъни бишенче мөфтият буларак.
Дмитрий Медведев башка мөфтиләргә Татарстан Диния нәзарәте тәҗрибәсен карарга киңәш итте. Аннан соң мөфтиләрнең теләк-үтенечләрен тыңлады. Мисал өчен, Мөфтиләр Шурасы рәисе Равил Гайнетдин Мәскәүдә мәчет салу проблемасын күтәрде. Инде икенче көнне үк мәсьәлә уңай хәл ителә башлаган. Шулай ук Хаҗга бару өчен квота санын арттыру мәсьәләсе дә чишелеш табарга тора.
Президент Русиядәге мөселман өммәтенең хәле турында әйтелгән фикерләрне бик җентекләп тыңлады. Хәзер бертуктаусыз дини китапларны тыю бара. Ә экспертиза комиссиясендә дин кешеләре катнашмый. Президентка бу турыда да әйттек.
- Сез татар имамнары җыенында Русиянең барлык имамнары да хезмәт хакы түли башлау тәкъдиме белән чыктыгыз. Моны президентка җиткердегезме?
- Әйттек. Хезмәт хакы мәсьәләсе хакында Баш мөфти Тәлгат Таҗетдин дә искә алды. Мин бу турында ачыктан-ачык белдермәсәм дә, докладта читләтеп кенә әйтеп киттем.
- Президент аңладымы соң?
- Дмитрий Медведев бу мәсьәләнең хәл ителерлек булуын белдерде. Ул мөфтиләр белән очрашуга кадәр ике урында җыелыш үткәргән иде. “Сезне күреп сөйләшкәч, ял итеп киттем”, дип куйды.
- Ә мөфтиятләрне берләштерү турында сүз булмадымы?
- Юк. Бу турыда сөйләшергә әле иртәрәктер.
Мөфти белән Тимер Сәгыйтев сөйләште
Чыганак: www.tatartime.com
