Сорау: Әссәламү галәйкүм! Госел алган вакытта хатын-кызга толымнарын сүтү мәҗбүриме?
Җавап: Үә галәйкүм әссәлам! Имам Әшраф Али әт-Таханви үзенең “Бехешти Зевар” хезмәтендә болай ди: “Әгәр чәчләр толымга җыелмаган булса, аларны тамырларына кадәр чылатып юу – фарыз. Чәчнең бер бөртеге генә дә коры калса, госел дөрес булмый. Ә чәчләр толымга үрелгән булса, толымны юешләү мәҗбүри түгел”.
Бу турыда башка хезмәтләрдә дә искә алына, мәсәлән, “Мүлтәка әл-әхбур” китабында болай диелә: “Хатын-кыз чәчләрен толымлап үргән булса һәм чәч тамырларын юешләсә, толымның үзен чылату кирәкми”.
Шулай итеп, чәчләрен толымга үргән хатын-кызга чәч тамырларын гына чылату да җитә, госел дөрес санала.
Ә Аллаһ яхшырак белүче.
