“Зәкят” хәйрия фонды мохтаҗларга нәзер корбаны ите өләште. Әлеге корбан итен фондка Казанда яшәүче бер мөселман китергән. Ит алты өлешкә бүленеп азкеремле һәм күпбалалы гаиләләргә инвалидларга, янгыннан зыян күрүчеләргә бирелгән.
“Зәкят” җитәкчесе Ирек хәзрәт Җиһаншин әйтүенә караганда, тирә-юнебездә ярдәмгә мохтаҗлар яши. “Фондка андыйлар мөрәҗәгать итеп торалар. Аларның ит алырга да акчалары юк. Бигрәк тә балалары авырып-чирләп китсә чыгымнар күбәя, ярдәм кирәк була. Безнең ярдәмне алар бик шатланып кабул итәләр”, - диде ул.
Мондый чараларны фонд даими үткәреп килә. Әйтик, һәр җомгада Казан рестораннары ярдәмендә мохтаҗларга ашлар оештырыла һәм кайнар ризык таратыла. Узган атнада фонд 100ләп аз керемле һәм мохтаҗ кешене ризыкландырган.
