17 ноябрьдә Балтач Үзәк мәчетендә районның абыстайлар җыены булды. Анда 160 тан артык дин кардәшебез катнашты. Җыелуның максаты мәрхүмнәрне соңгы юлга озату тәртипләре хакында сөйләшү иде.
Җыен баш казый, район имам-мөхтәсибе Җәлил хәзрәтнең мәрхүмнәрне соңгы юлга озату тәртибе турындагы чыгышы белән башланды.
Хәзрәт кеше үлгәннән соң төн саклау, сәдакалар бирү, Коръән укыту ашлары, зиратка бару, җеназа намазы һ.б. турында Пәйгамбәребез с.г.в. хәдисләренә таянып, җентекләп вагазь сөйләде.
Шулай ук чарада күмү тәртипләрен аңлату өчен күрсәтмә дәрес уздырылды. Сорауларга җаваплар бирелде.
