Бүген Татарстан мөфтие Камил хәзрәт Сәмигуллин Татарстанның Кама аръягы төбәге имамнары белән очрашу ниятеннән Чаллы мөхтәсибәтенә эшлекле сәфәр кыла.
Мөфти белән очрашу Чаллының “Ак мәчет”ендә уздырыла. Чарада барлыгы 12 мөхтәсибәт – Чаллы, Түбән Кама, Тукай, Әгерҗе, Актаныш, Алабуга, Мамадыш, Мендеелевск, Минзәлә, Зәй, Мөслим, Сарман районнары имамнары җыелды.
Сөйләшүдә, шулай ук, баш казый Җәлил хәзрәт Фазлыев, мөфти урынбасары Рөстәм хәзрәт Хәйруллин, төньяк-көнбатыш төбәге казые Рөстәм хәзрәт Вәлиуллин, Чаллы имам-мөхтәсибе Әлфәс хәзрәт Гайфуллин һәм район имам-мөхтәсибләре катнаша.
Мөфтинең мөхтәсибәт эшчәнлеге белән танышуы, имамнарны кызыксындырган сорауларга җавап бирүе, җирлектә яшәүче мөселманнар белән очрашуы көтелә.
Шулай ук очрашу кысаларында "Зәкят" хәйрия фонды, "ТР МДН Хаҗ" рәсми операторы эшчәнлеген тәкъдим итү була.
“Ак мәчет”кә килгәч тә хәзрәтләр узган елның 17 нче декабрендә ачылган “Татар ислам мәгарифе тарихы” музеенда булдылар, биредәге мәгълүматлар белән таныштылар.
