Татарстан мөфтие Камил Сәмигуллинның Россиянең мөселман дин әһелләре делегациясе составында Үзбәкстандагы сәфәре дәвам итә. Бүген хәзрәт РФның Үзбәкстан Республикасында илчесе Владимир Тюрденев белән күреште. Очрашуда ике республика арасында ислам үсеше мәсьәләләрендә хезмәттәшлекнең киләчәге турында сөйләшенде һәм дини мәгарифне камилләштерү буенча фикерләр әйтелде. Моннан тыш, мөфти Үзбәкстандагы Татарстанның вәкаләтендә дә булып китте.
Эшлекле сәфәр кысаларында Россия кунаклары өчен Үзбәкстан Республикасы Министрлар Кабинеты каршындагы дини эшләр буенча комитет рәисе Артурбек Юсупов белән очрашу да көтелә. Кунаклар шулай ук Ташкент, Бохара һәм Самарканд шәһәрләрендәге истәлекле урыннар белән танышачак.
