Чистай мөхтәсибәте ел саен “Мәктәпкә әзерләнергә булыш!” республикакүләм хәйрия акциясендә катнаша. Быел Чистайның район имам-хатыйблары, Мөселман яшьләре берлеге активистлары, Мөслимәләр берлеге һәм җирле мөхтәсибәт "Белемгә юл" дип исемләнгән балалар бәйрәме үткәрде. Чарада башкарма комитет җитәкчесенең социаль мәсьәләләр буенча урынбасары Галина Задворнова һәм башкарма комитет җитәкчесенең мәгариф мәсьәләләре буенча урынбасары Госман Набиуллин катнашты.
Чара Чистай имам-мөхтәсибенең балаларга гыйлем алуның әһәмиятен аңлаткан мөрәҗәгате белән башланды. Чарада балалар 5 командага бүлешеп «Алгебра”, “Химия”, “Лингвистика”, “Физика”, “География” дигән "станцияләрне" үтте. Квестан соң мохтаҗ гаиләләрдә тәрбияләнүче 55 балага мәктәп кирәк-яраклары тутырылган букчалар тараттылар.
