КФУның Ислам һәм Ислам мәгарифе үсеше буенча Ресурс үзәгендә Татарстан мөфтие күренекле татар дин галиме һәм җәмәгать эшлеклесе Галимҗан Баруди турында “Ислам мультимәдәни дөньяда” конференциясендә катнашучы галимнәр һәм студентлар өчен лекция сөйләде. Мөфти хәзрәт дин әһеленең эшчәнлегенә, басылып чыккан хезмәтләренә тукталды, сорауларга җавап бирде.
Камил хәзрәт Сәмигуллин Галимҗан Барудиның басылып чыккан 29 хезмәте булуы һәм әлеге китаплар турында Телеграмда үз каналында кыскача күзәтү биреп баруы турында әйтте. Лекция барышында мөфти галимнең хәзерге көндә дә актуаль булган никах, талак мәсьәләләренә, галимнең карашларына тукталды. Тыңлаучылар киләсе очрашуда Муса Бигиев турында чыгыш ясарга үтенделәр.
