Бүген, Рәҗәб аеның 6-нчы көнендә, Татарстан мөфтиятендә Аксакаллар шурасының Президиум утырышы узды. Көн тәртибенең иң мөһиме мәсьәләсе булып татар халкының үсеш Стратегиясенә кертү өчен тәкъдимнәрне җыю һәм аксакалларның бу хактагы резолюциясе проекты турында фикер алышу торды. Киңәшмә Татарстан мөфтие Камил хәзрәт Сәмигуллин, шулай ук танылган галимнәр һәм җәмәгать эшлеклеләре катнашында узды: алар арасында Индус Таһиров, Дамир Исхаков, Фәндәс Сафиуллин һәм башкалар бар иде.
Аксакалларны һәм аларның кунакларын сәламләп, Татарстан мөселманнары башлыгы Ислам диненең татар милли үзенчәлеген саклауда стратегик роле турында янә искә төшерде һәм бу өлкәдә Татарстан Республикасы мөселманнары Диния Нәзарәтенең тәҗрибәсе белән таныштырып, берничә аеруча мөһим башлангычларның нәтиҗәлелеген ассызыклап, җомга вәгазьләрен татар телендә алып бару, татар телен өйрәнү буенча мәчет каршындагы курслар оештыру, татар телендә нәшрият эшчәнлеген гамәлгә ашыру, татар дини мирасын торгызу турында җентекләп сөйләде. Ул шулай ук "Татар халкының гореф-гадәтләре исламга нигезләнә, димәк, Стратегияне эшләгәндә татар халкын берләштерүче төп фактор буларак хезмәт иткән Исламны исәпкә алырга кирәк", - дип ассызыклады.
Аннары Аксакаллар шурасы рәисе Айрат хәзрәт Әюпов катнашучыларны резолюция проекты белән таныштырды, шулай ук аларны үз тәкъдимнәре белән чыгыш ясарга чакырды. Иң беренче нәүбәттә аксакаллар Диния Нәзарәтенә татар халкының үсеш Стратегиясен эшләүчеләргә документта Ислам ролен көчәйтү үтенече белән мөрәҗәгать иткәне өчен рәхмәт белдерделәр һәм рәсми хатта билгеләнгән барлык башлангычларны бертавыштан хупладылар. Үз чиратында аксакаллар милли мәгариф һәм фән үсеше өлкәсендә үз тәкъдимнәрен әзерләделәр. Мәсәлән, мәктәпләрнең белем бирү программасына әхлак дәресләре (әхлак) кертү һәм башка тәкъдимнәр.
Аксакаллар шурасы - Диния Нәзарәтенең консультатив органы. Киңәшче ролен башкаручы, күпьеллык тормыш һәм профессиональ тәҗрибәгә ия булган аксакаллар ТР мөфтиенә вәкаләтләрен нәтиҗәле башкарырга, республикадагы рухи потенциалны һәм әхлакый нигезләрне камилләштерүдә ярдәм итәләр һәм ТР МДН җитәкчесенең аерым махсус йөкләмәләрен башкаралар. Бүген ТР мөселманнары Диния нәзарәте Аксакаллар шурасы төрле өлкәләргә кагылышлы күптөрле мәсьәләләрне хәл итүдә актив катнаша: әхлаксызлыкка каршы җәмәгатьчелек алдында җитди кисәтү белдерүдән алып җәмгыятьтә мөселманнарның хокукларын яклау мәсьәләләренә кадәр. Күпьеллык тормыш тәҗрибәсенә һәм һөнәри осталыкка ия аксакаллар 2018 елда ТР мөселманнары Диния нәзарәтенә вәкаләтләрне нәтиҗәле гамәлгә ашыруда, шулай ук җәмәгать урыннарында һәм мәктәпләрдә килеп туган
конфессияара бәхәсләрне уңай хәл итүдә ярдәм күрсәтте. Аксакаллар берничә тапкыр судка кадәрге тикшерүләрдә һәм низагларны хәл иткәндә чыгыш ясады, Татарстанда ислам принципларын һәм нормаларын пропагандалау һәм үтәү буенча эш башкарды. Аксакаллар шурасы катнашында мөселман җәмәгатьчелегенең теге яки бу мөһим мәсьәләләр буенча республика җитәкчелегенә нигезле һәм эзлекле рәвештә өметләре җиткерелде. Шул исәптә: татар телендә укыта алучы педагогик кадрлар, татар телендә балалар өчен телевизион контент булдыру, Казанда Җәмигъ мәчете төзү, республика зиратларын тәртипкә китерү, мәктәпләрдә укыту программалары эчтәлеген әхлакый яктан көчәйтү, татар мәктәпләрен ачу һ.б.
