Бүген, Шәгъбан аеның 22 нче көнендә, мөселман дин әһелләре шәһәркүләм җыештыру-чистарту өмәсендә катнаштылар. Гадәттәгечә, Татарстан мөселманнары Диния нәзарәте коллективына әлеге саваплы эшне башкару өчен “Хозур” нәшрият йорты, “ТР Вакыф” Фонды, “Зәкят” хәйрия фонды хезмәткәрләре, “Мөхәммәдия” һәм Ислам динен кабул итүгә 1000 ел исемендәге Казан югары мөселман мәдрәсәсе шәкертләре кушылды. Өйләгә кадәр барлыгы сиксәнгә якын кеше җыештыру эшләрендә катнашты.
Өмәдә катнашу өчен Татарстан Республикасы мөселманнары Диния нәзарәте Казанның Яңа бистә зиратын сайлады: биредә илледән артык күренекле дин әһелләре, мәгърифәтчеләр, галимнәр, остазлар җирләнгән. Шулар арасында: Галимҗан һәм Салихҗан Галиевләр, Шиһабетдин Мәрҗани, Каюм Насыйри, Әхмәдһади Максуди, Сөнгатулла Бикбулатов, Шәйхелислам Хәмиди, Әхмәдзәки хәзрәт Сафиуллин, Габделхак хәзрәт Саматов.
Өмәдә катнашучылар каберлекләрне чүп-чардан, кипкән үләннәрдән һәм корыган агачлардан аралады, аллеяларны себереп җыештырды, кабер ташларын чистартты.
Ахырдан күмәк рәвештә әлеге зиратта үзләренең соңгы сыену урыннарын тапкан дин әһелләренең, күренекле мәгърифәтчеләрнең, остазларның рухларына дога кылынды.
Татарстанның барлык мөхтәсибәтләрендә дә республиканың мөселман зиратларын тәртипкә китерү дәвам итә.
Фоторепортаж: http://dumrt.ru/media/galleries/galleries_1577.html
