Бүген, зөлхиҗҗә аеның 16нчы көнендә (26нчы июльдә), Татарстан мөфтие Камил хәзрәт Сәмигуллин Нәзарәттә “Центр экспертизы по маркировке и мониторингу продукции” ҖЧҖ директоры Александр Иванович Даган һәм эшмәкәр Рамил Миңнеханов белән очрашты. Очрашуда шулай ук Нәзарәтнең “Хәләл” стандарты комитеты рәисе Габбас хәзрәт Кадиров катнашты. Аннары җитәкчеләр якынлашып килүче XII «Россия – Ислам дөньясы: KazanSummit-2021» халыкара икътисад саммитының программасы буенча фикер алыштылар. Мөфти хәзрәт саммит көннәрендә эшләячәк Диния нәзарәте мәйданчыклары белән таныштырып узды. Алга таба эшлекле сөйләшүне дәвам итеп, хәләл базар үсеше өлкәсендә хезмәттәшлекне ныгыту ниятеннән, саммит вакытында кул кую ниятләнгән меморандум проекты буенча сөйләшү узды.
