Әлмәт шәһәре Агропоселок микрорайонының "Нурлы" мәчетендә Әлмәт районы мәчетләре мөәзиннәре арасында азан әйтү буенча "Матур азан" бәйгесе узды. Чара Әлмәт районы имам-мөхтәсибе Исмәгыйль хәзрәт Сингатуллинның сәламләү сүзе белән башланып китте. Исмәгыйль хәзрәт азан укуның өстенлекләре, мәңгелек тормыштагы мөәзиннәргә бирелә торган игелекләр турында сөйләде.
Бәйге вакытында мәртәбәле жюри азан әйтү – намазга чакыруның төгәл, көйле һәм дөрес башкарылуын бәяләде. Шунысы куанычлы: әлеге чарада азан татар мәкаме белән яңгырады һәм бәйгедә катнашучыларның күпчелеге милли дини киемнәрдән килгән иде.
Бәйге нәтиҗәләре буенча иң яхшы мөәзиннәр дип шушылар танылды:
1 нче урын - Илзам Хаҗиев (Агропоселок микрорайоны мәчете),
2 нче урын - Рәис Әхмәтшин (Урсалы мәчете),
3 нче урын - Илфак Шиһапов (Бишмунча авылы мәчете),
4 нче урын - Расих Гайфуллин (Шарлама авылы мәчете)
5 нче урын - Нәгыйм Дәрҗеманов (Кичучат авылы мәчете)
Бәйгедә җиңүчеләр һәм призерлар Әлмәт мөхтәсибәтеннән кыйммәтле бүләкләр, ә катнашучылар - дипломнар һәм "Ансар" хәйрия фондыннан сертификатлар белән бүләкләнде.
Чара Коръән уку һәм Агропоселок микрорайонының "Нурлы" мәчетендә төшке аш белән тәмамланды.
