Бүген, җөмәдәл-әүвәл аеның 24-нче көнендә (28-нче декабрьдә), Татарстан мөфтие Камил хәзрәт Сәмигуллин «Корстон» сәүдә-күңел ачу комплексында «Ел җитәкчесе – 2021» республикакүләм иҗтимагый бәйгесе лауреатларын бүләкләү тантанасында катнашты. Әлеге чарада шулай ук Татарстан Республикасы Президенты Рөстәм Миңнеханов, Татарстан Республикасы дәүләт хакимияте органнары, федераль органнар, министрлыклар һәм ведомстволар вәкилләре, муниципаль берәмлекләр, эш бирүчеләр берләшмәләре, һөнәри берлекләр, фәнни даирәләр, танылган сәнәгатьчеләр һәм эшкуарлар бар иде.
Әлеге конкурс эшендә югары нәтиҗәләргә ирешкән һәм республиканың социаль-икътисадый үсеше бурычларын хәл итүгә сизелерлек өлеш керткән иң яхшы предприятие һәм оешма җитәкчеләренең уңай тәҗрибәсен җәмәгатьчелек тарафыннан тану, билгеләп үтү һәм тарату максатыннан үткәрелә.
