Бүген Татарстан Президенты Рөстәм Миңнеханов хоккей буенча «Дружба – Дуслык» Кубогы II Бөтенроссия турнирында булды. Ярышлар төрле конфессия вәкилләре арасында тынычлыкны һәм татулыкны ныгытуга һәм сәламәт яшәү рәвешен пропагандалауга юнәлтелгән. Командалар составында мөселман һәм православие дин әһелләре һәм мәхәллә кешеләре, РФ төньяк һәм Кара диңгез флоты хәрбиләре, Казан танк училищесы курсантлары, ТР Югары суды хезмәткәрләре, спортчылар бар.
Турнир кичә Казан шәһәренең Спорт сараенда Татарстан мөфтие Камил хәзрәт Сәмигуллин һәм республика митрополиты владыка Кирилл катнашында ачылды. Бүген рухи лидерлар Президент белән бергә Казанның «Миллениум» диниара командасы һәм ТР Югары Судының «Фемида» командасы матчын күзәттеләр.
Уен тәмамланганнан соң, дәрәҗәле кунаклар "Дружба - Дуслык" Кубогының беренче һәм икенче уен көненең иң яхшы уенчыларын бүләкләү тантанасын уздыру өчен бозга чыктылар. Турнирда катнашучылар алдында чыгыш ясаганда, Рөстәм Миңнеханов хоккейның элеккечә үк яраткан спорт төре булып калуын әйтте һәм барысына да яхшы уен теләде. Рөстәм Миңнеханов шулай ук бу турнирның традициягә әйләнәчәген белдерде.
Аннары Рөстәм Миңнеханов узган очрашуларда аерылып торган иң яхшы уенчыларга бүләкләр тапшырды.
