Бүген Татарстан мөфтие Камил хәзрәт Сәмигуллин Казанның «Ярдәм» мәчетендә һәм «Ярдам-Помощь» гомуммилли хәйрия фонды комплексында булды. Биредә ул фондның агымдагы эшчәнлеге белән танышты, шулай ук фондның күп функцияле спорт үзәген карады.
«Ярдам-Помощь» хәйрия фондының күп функцияле спорт комплексы барлык категория инвалидларны тернәкләндерүне дә, шулай ук сәламәт кешеләр шөгыльләнүне дә күз алдында тота. Ул физик мөмкинлекләре чикле булганнар өчен тулысынча җайлаштырылган: анда мөстәкыйль рәвештә авыр хәрәкәтләнә торган төркемнәр тренажерларга бик җайлы гына килеп җитә ала. Шулай ук әлеге бинада универсаль спорт залы да бар.
Комплексның паралимпия чемпионнарын тәрбияләү өчен база булу мөмкинлеге бар. Биредә спортчылар бочче, фехтование, көрәш һәм башка дисциплиналар буенча да осталыкларын камилләштерә алачак, болар инвалидларның физик, мораль һәм интеллектуаль үсешенә уңай йогынты ясаячак. Хәзерге вакытта сертификатларга ия белгечләр катнашында мөмкинлекләре чикләнгән кешеләр өчен күнекмәләр графигы эшләнә.
Комплекс 2022 елның икенче кварталында ачылыр дип көтелә.
