Бүген, зөлкагъдә аеның 16нчы көнендә (15нче июньдә), Нәзарәттә мөфти Камил хәзрәт Сәмигуллин танылган эшмәкәр, җәмәгать эшлеклесе, “Хәләл планета” компаниясен гамәлгә куючы Радик Гафуров белән очрашу узды. Ул Татарстан мөселманнары башлыгына чираттагы проектын җиткерде һәм аны тормышка ашыру тәкъдимнәре белән бүлеште. Кунак Казанда төзелүче Җәмигъ мәчет территориясен төзекләндерү, ямьләндерү буенча фикерләре белән уртаклашты. Очрашу барышында ул төрле илләрнең тәҗрибәсе турында сөйләп үтте. Мөфти хәзрәт аның әлеге тәкъдимнәрен игътибар белән тыңлап, барлык кызыклы тәкъдимнәрне “Игелек-Доброта” фонды җитәкчелегенә тапшырачагын әйтте.
Очрашу кунагы Нәзарәт һәм аның карамагындагы оешмаларның хезмәттәшлек алып барырга һәрвакыт ачык булулары һәм барлык тәкъдим-фикерләрне ишетергә әзер булулары өчен мөфти Камил хәзрәт Сәмигуллинга рәхмәт сүзләрен җиткерде, Җәмигъ мәчет төзү буенча проектны сайлап алуда, яшь белгечләр, имам-хатыйблар әзерләүдә уңышлар теләде.
