Бүген, мөхәррәм аеның 25нче көнендә (23нче августта), Нәзарәттә Татарстан мөфтие Камил хәзрәт Сәмигуллин халыкны кабул итү көнен уздырды.
Өч сәгать дәвамында мөфти дин кардәшләребез белән аралашты, алар аңа үзләренең теләк-тәкъдимнәре һәм шәхси гозер-үтенечләре белән килде. Нигездә, сораулар татар-мөселман традицияләрен саклау һәм Ислам инфраструктурасын үстерү, Казанның белем бирү учреждениеләрен хәләл ризык белән тәэмин итү, шулай ук дини белем алу белән бәйле иде.
Аерым алганда, психолог, РИИ мөгаллиме Гөлназ Галиева мөфтият белгечләре белән берлектә язылган “Как стать психологом для себя” китабын тәкъдим итте. Ул шулай ук мөфтигә Мөселманнарга психологик ярдәм күрсәтү ассоциациясе тарафыннан имамнарның квалификациясен күтәрү курслары өчен программалар эшләнүе турында сөйләде.
Бүген мөфтидә шулай ук Башкортстаннан килгән егетләр – “Современный Ислам” мобиль кушымтасын эшләүчеләр – Реал Сабирьянов һәм Эмиль Казакбаев та булды. Татарстан мөфтие аларның идеясен хуплады һәм яшьләргә әлеге проектны эшләү буенча консультация бирү өчен белгечләр тәкъдим итте.
Мөфтинең халык белән очрашулары атна саен үткәрелә. Язылу өчен телефон: +7 (843) 237-94-53.
