Бүген, сафәр аеның 12 нче көнендә (8 нче сентябрь) Татарстан мөфтие Камил хәзрәт Сәмигуллин Казахстан Республикасының Россия Федерациясендәге Гадәттән тыш һәм Тулы вәкаләтле Илчесе Ермек Кошербаев белән очрашты. Очрашуда шулай ук Казахстан Республикасының Казан шәһәрендәге Генераль консулы Ерлан Искаков, мөфти урынбасары, «Хозур» нәшрият йорты генераль директоры Ришат Хәмидуллин, Татарстан Республикасы мөселманнары Диния нәзарәте аппараты җитәкчесе Ирек Арсланов һәм башка рәсми затлар катнашты.
Очрашу Татарстан Республикасы мөселманнары Диния нәзарәте резиденциясендә узды. Анда катнашучылар Татарстан мөселманнары Диния нәзарәте һәм Казахстан илчелеге арасында хезмәттәшлекне үстерү буенча үзара тәкъдимнәр белән алмаштылар.
Сөйләшү барышында Татарстан һәм Казахстанның кардәш халыклары арасында җылы дуслык багланышлары булуы ассызыкланды. Шулай ук дини белем бирү һәм мәгарифкә кагылышлы көнүзәк мәсьәләләр, шул исәптән дини оешмалар өчен әзерлекле кадрлар хәзерләп чыгару, ислам инфраструктурасын үстерү турында да фикер алыштылар. Мөфти хәбәр иткәнчә, Казахстаннан бик күп шәкертләр Россия ислам институтында дистанцион укыйлар. Ул шулай ук, казах теленең татар теленә якын булуын искәртеп, казах шәкертләрен татар телендә белем бирүче «Мөхәммәдия» мәдрәсәсендә укырга чакырды.
Казахстан Республикасының Россия Федерациясендәге Гадәттән тыш һәм Тулы вәкаләтле Илчесе Ермек Кошербаев Камил хәзрәт Сәмигуллинга җылы кабул итүе өчен рәхмәт әйтте.
Бүген очрашу истәлеге итеп мөфти хөрмәтле кунакка Коръәннең “Казан басма”сын, рус теленә тәрҗемә ителеп дөнья күргән “Сәхих әл-Бохари” хәдисләр җыентыгының «Зубдат» версиясен һәм башка китаплар бүләк итте.
