Бүген, Рабигыль-ахир аеның 12нче көнендә (7нче ноябрьдә), Казан (Идел буе) федераль университетының Халыкара мөнәсәбәтләр институтында Россия ислам институты һәм Татарстан мөфтияте катнашында өстәмә һөнәри белем бирү программасы буенча “Югары һәм урта дини белем бирү оешмаларын лицензияләү һәм лицензион күзәтчелек” дип исемләнгән квалификация күтәрү курслары ачылды.
Курсларда укыту-методика идарәләре, лицензияләү бүлекләре, урта һәм югары мөселман дини белем бирү оешмалары деканатлары һәм кафедралары, мәгариф системасы белгечләре, методистлар, укыту-методик эш буенча белгечләр катнаша. Курсларга килеп һәм читтән торып та катнашырга мөмкин. Дәресләр 8нче ноябрьгә кадәр Пушкин урамы, 1/55нче йорт адресы буенча урнашкан бинада дәвам итә. Укыту барышында белем бирү эшчәнлеген лицензияләүнең хокукый нигезләре, лицензион таләпләр, ислам югары уку йортларында һәм мәдрәсәдә уку барышын дөрес оештыру, мәгариф өлкәсендә дәүләт күзәтчелеге, белем бирү сыйфатын бәйсез бәяләү турында мәсьәләләр каралачак.
Курсларда белем алу нәтиҗәләре буенча Казан федераль университетыннан квалификация күтәрү турында таныклык биреләчәк.
Дәресләрне ТР Мәгариф һәм фән министрлыгының лицензион һәм күзәтчелек органнары вәкилләре, мәгариф өлкәсендә әйдәп баручы белгечләр үткәрә.
Курсларга Чечня, Татарстан, Башкортстан, Дагыстан республикаларыннан, Саратов, Мәскәү шәһәрләреннән катнашучылар килде.
Программа беркетелгән файлда.
