11нче декабрь көнне Лаеш районы Сиңгел авылында “Чишмә” проекты кысаларында чираттагы бушлай чиста су алу пункты ачылды. Лаеш районындагы алтынчы пунктның тантаналы ачышында район башлыгы Илдус Фатих улы Зарипов, имам-мөхтәсиб Наил хәзрәт Әбелханов, хәйрия проектының координаторы – Азат Галимҗан улы Гайнетдинов, төзүчеләр һәм меценатлар катнашты.
Реабилитация һәм адаптация үзәге генераль директоры, Иҗтимагый палата әгъзасы Азат Галимҗан улы әйтүенчә, бу проектның максаты – халыкны бушлай сыйфатлы чиста су белән тәэмин итү. Проект “Чишмә” дип аталса да, бу гади кизләү суы түгел. Беренче чиратта артезиан суын чыгару өчен, тирән скважина бораулана. Аннан соң кыйбатлы, суны тирәнтен чистарта торган фильтрлар куела. Көненә бу ясалма чишмә 8 тонна чиста эчәргә яраклы су биреп тора. Бу суны диненә һәм милләтенә бәйсез рәвештә теләгән һәр кеше, юлчылар куллана ала.
Наил хәзрәт Әбелханов мәҗлесне Коръән укып башлап җибәрде. Хөрмәтле кунаклар чыгыш ясагач, проектны тормышка ашыруга көч куйган кешеләргә рәхмәт хатлары тапшырылды.
Ачылышка килүчеләргә Наил хәзрәт Аллаһ йортларына килүнең мөһимлеге турында вәгазь сөйләде. Чөнки чишмә – чиста су чыганагы булса, мәчет – рухи яктан чистарыну урыны булып кала.
