Ял көннәрендә Чистай мөхтәсибәте мөселман яшьләре берлеге активистлары Рәҗәб ае җитү уңаеннан хәйрия акциясе үткәрде - Чистай мөхтәсибәтенең социаль ашханәсендә тукланучы аз керемлеләргә һәм мохтаҗларга, игътибар күрсәтеп, бүләкләр тапшырды.
Активистлар шәһәрнең 5 мохтаҗ гаиләсен бүләкләр белән сөендерде – алар он, ит, сөт продуктлары, чәй һәм тәм-томнарны кабул итеп алды. Чистай мөхтәсибәтендә мондый акцияләр даими үткәрелә.
Исегезгә төшерәбез, "Социаль ашханә" проекты кысаларында мөхтәсибәттә һәр атна саен беренче һәм икенче ашлар пешерелә, ә аннан өйләренә таратыла. Бүгенге көндә бу 30 дан артык гаилә (55 кеше) дигән сүз.
