Бүген, Зөлхиҗҗә аеның 8нче көнендә (26нчы июньдә), Төркия Республикасының Казандагы Генераль консулы Исмәт Эрикан Татарстан мөфтие Камил хәзрәт Сәмигуллин белән саубуллашу очрашуына килде. Аның бу вазифалардагы хезмәте тиздән тәмамлана. Консул Казанда 2019 елдан хезмәт куйды.
Исмәт бәй Камил хәзрәтне якынлашып килүче Корбан гаете белән котлады, үзенең Казандагы эшчәнлегенә кыскача нәтиҗәләр чыгарды һәм Камил хәзрәткә Консуллык һәм Нәзарәт арасындагы гуманитар өлкәдә багланышлары өчен рәхмәтен белдерде. Ул шулай ук мөфтиятнең җәмгыятьтә ислам кыйммәтләрен һәм динара татулык традицияләрен ныгытуда зур нәтиҗәле хезмәтен югары бәяләде. Камил хәзрәт үз чиратында кунакка үзенең ихлас теләкләрен җиткерде һәм хезмәттәшләкнең истәлеге итеп бүләк тапшырды.
