5нче августтан Лаеш районы мөхтәсибәтендә 7-17 яшьлек балалар өчен рухи-сәламәтләндерү курслары ачылды. Ул күчмә форматта, ягъни табигатьтә чыгып үткәрелә. Оештыручылар Яшел үзән районы Семиозерка авылының балалар сәламәтләндерү лагеры янәшәсәсендә палаткалар шәһәрчеге корды. Биредә бер атна дәвамында 31 малай ял итә. Бер палаткага 4 бала урнашты. Алар Лаеш районы авылларыннан, Казан шәһәреннән җыелды.
Рухи-сәламәтләндерү курсларының программасына килгәндә, көненә 2 тренировка, табигать кочагында актив спорт уеннары, биш вакыт намаз уку, вәгаз кичәләре каралган. Балалар ислам нигезләрен өйрәнәләр, 5 тапкыр хәләл туклану оештырылган. Балаларга Лаеш районы имам-мөхтәсибе Наил хәзрәт Әбелханов килеп вәгазьләр сөйли.
