Әлмәт мөхтәсибәтендә "Ислам. Беренче адымнар" курсларының икенчесе тәмамланды. Курсларны Әлмәт мөхтәсибәте, "Әхәват" мөселман хатын-кызлары берләшмәсе һәм "Ансар" хәйрия фонды оештырды.
Укучылар бер ай дәвамында ислам нигезләрен, госел һәм таһәрат алырга һәм намаз укырга өйрәнде. Дәресләр һәр атна саен якшәмбе көнне шәһәрнең Үзәк мәчетендә узды. Аларны шәһәр мәчетләре һәм мәдрәсәләрендә эшләүче әзерлекле имамнар алып барды. Ир-атлар һәм хатын-кызлар өчен аерым төркемнәр оештырылды.
Курслар узу турында сертификатлар һәм бүләкләр тапшыруга багышланган чыгарылыш кичәсе "Нурлы" мәчетендә узды.
Исегезгә төшерәбез, киләсе елның февралендә өченче агымда узачак курсларга +7 (917) 266-30-30 телефон номеры буенча алдан язылырга мөмкин.
