Россиядә 1-10нчы декабрь көннәрендә Инвалидлар декадасы билгеләп үтелә. Ул мөмкинлекләре чикле кешеләрнең проблемаларына җәмәгатьчелекнең игътибарын юнәлтүне күздә тота.
Әлеге ункөнлек уңаеннан Түбән Кама мөхтәсибәте шәһәрнең “Рубаха” тернәкләндерү үзәге мәйданчыгында 50гә якын инвалид өчен Коръән мәҗлесе үткәрде. Әлеге чарага төрле яшьтәге гарип-горәбәләр, авырулар, инвалид балалар тәрбияләүче әти-әниләр җыелды. Мәҗлестә хафиз Хәлил хәзрәт Хәйбрахманов Коръән аятьләре укыды, дога кылды, шөкрана кылу турында вәгазь сөйләде. Әлеге очрашуда шулай ук Түбән Кама районы Башкарма комитеты җитәкчесенең социаль мәсьәләләр буенча урынбасары Илдар Рамазанов, инвалидлар белән эшләүче активистлар катнашты. Мәҗлестә инвалидларны пылау, тәм-томнар белән сыйладылар.
Түбән Кама мөхтәсибәте ай саен бер тапкыр 100 мохтаҗ һәм авыру кешегә бер айга җитәрлек күләмдә азык-төлек җыелмалары тарата, ә үзләре ашарга әзерли алмаган 50 кешегә көн саен кайнар ризыкны өйләренә илтеп кайта.
