Татарстан Республикасының Дәүләт Киңәшчесе Минтимер Шәймиев бүген туган көнен билгеләп үтә. Бу уңайдан Татарстан Мөфтие Камил хәзрәт Сәмигуллин аңа ихлас котлауларын, теләкләрен җиткерде һәм ТР МДН Президиумы карары нигезендә Мәрҗани орденын тапшырды. Татарстан мөфтиятенең әлеге югары бүләге дәүләт башлыкларына, Россия төбәкләре җитәкчеләренә, дини һәм милли гореф-гадәтләрне саклауга зур өлеш керткән меценатларга, шулай ук ислам үсеше өлкәсендә зур казанышларга ия булучыларга тапшырыла.
Камил хәзрәт Минтимер Шәрип улы белән очрашу барышында аңа Татарстан мөфтияте эшчәнлегенә күрсәткән ярдәмнәре өчен рәхмәтен белдерде.
Очрашуда шулай ук Татарстан һәм Казан митрополиты Кирилл да катнашты. Җитәкчеләр динара багланышлар һәм башка актуаль темалар буенча фикер алышты.
shaimiev.tatarstan.ru фотосы
