17 декабрь көнне Буа районы Өчмунча авылы мәдәният сараенда Мәүлид мәҗлесе булып үтте. Мәҗлестә Фәһим хәзрәт Сөләйманов, Госман мәчетенең икенче имамы Ренат хәзрәт Ибраһимов, Килдураз авылы имамы Кадим хәзрәт Мөбарәкшин, авыл советы рәисе Зөлфәт Әхәтов, төп кунак – дини җырлар авторы Ильяс Халиков катнашты.
Мәҗлесне авыл имамы Җәгъфәр хәзрәт Галәветдинов башлап җибәрде. Ул килүчеләрне Мәүлид ае белән тәбрик итте. Фәһим хәзрәт үзенең вәгазь-нәсыйхәтен Пәйгамбәребез салләллаһу галәйһи вә сәлләмнең тормыш юлыннан дәлилләр китереп сөйләде, Буа мөхтәсибәте исеменнән Мәүлид ае белән котлады. Кадим хәзрәт өчмунчалыларга хәдис-аятьләр китереп вәгазь-нәсыйхәтен ирештерде. Ренат хәзрәт үзенең чыгышын мөнәҗәт аша тәкъдим итте. Кичә Ильяс Халиковның матур, мәгънәле җыр-мөнәҗәтләре белән үрелеп барды. Шундый матур кичә оештырганнары өчен Ильяс Халиковка һәм аның төркеменә авыл халкы рәхмәтен җиткерде.
