Буа районы Комарово бистәсендә Мәүлид узды

8-нче ноябрь кичәсендә Буа районы Комарово бистәсе мәчетендә тәүге тапкыр Мәүлид кичәсе оештырылды. Мәүлидтә һәрдаим шушында намазга йөрүчеләр һәм кунаклар катнашты. Ястү намазы укылганнан соң мәчет имамы Шамил хәзрәт Вәлиуллин Мәүлид ае турында кыскача вәгазь сөйләп, Мәүлид касыйдәләрен укыды. Кунак булып килүче Ринат әфәнде Ибраһимов татарча, гәрәпчә мөнәҗәтләр башкарды. Мәчетнең әйдәп баручысы Зөфәр Фатыйхович килүчеләрне сәламләп, матур теләкләрен җиткерде. Үзәк мәчет имам-хатыйбы Рөстәм хәзрәт Хәйбуллин мәҗлесне йомгаклап, илгә-көнгә догалар кылып тәмамлады.