Бүген, Рабигыль-ахыр аеның 1-нче көнендә, Арча шәhәренең "Үзәк" мәчетендә район имамнары җыелышы узды. Әлеге утырыш шушы көннәрдә Аллаhы хозурына күчкән Өчиле авылы мәхәлләсе хәзрәте Рәүф хәзрәт Гыйльмиҗанов рухына багышлап Коръән аятьләре укудан башланып китте. Көн тәртибендә күп кенә сораулар күтәрелде, Мәүлид аена йомгак ясалды. Татарстан мөфтиенең мөхтәсибәтләр белән эшләү буенча киңәшчесе Равил хәзрәт Зөфәров мөфти Камил хәзрәт Сәмигуллинның сәламен җиткерде һәм имамнарга шәһәдәтнамәләр тапшырды. “Аллаhы өммәтебезгә файдалы булып, хезмәт кылырга нысыйп итсен!” – дип таралышты дин әһелләре.
