Мәүлид ае уңаеннан Нурлат мөхтәсибәтенең яшьләр бүлеге балалар һәм яшүсмерләр арасында спорт ярышы оештырды. Мини-футбол буенча барлыгы өч команда көч сынашты. Ярыш “Тулпар” спорт комплексында үтте. Катнашучыларны район-имам мөхтәсибе Наил хәзрәт Әбелханов сәламләде. Ул үз чыгышында рухи кыйммәтләрне, традицион гореф-гадәтләрне саклауның әһәмияте хакында нәсыйхәт сүзләрен ирештерде. Наил хәзрәт балаларны Мәүлид ае белән тәбрикләде һәм барлык катнашучыларга мөхтәсибәт исеменнән бүләкләр таратты.
