23 февраль көнне Буа районының “Импульс” спорт сараенда Буа мөхтәсибәте кубогына волейбол ярышы булып узды. Аны мөхтәсибәтнең спорт өлкәсендәге ярдәмчесе Марсел әфәнде Салаватуллин оештырды. Ярышта сигез команда катнашты. Алар арасында - хакимият командасы, шикәр заводы, электр челтәрләре, Адав-Толымбай, "Юность" һәм Буа мөхтәсибәтеннән ике команда катнашты.
Беренчеләрдән булып Буа имам-мөхтәсибе Илмир хәзрәт Хәсәнов килгән командаларга үзенең хәер-фатихасын, рәхмәтен җиткерде.
Уенчылар икешәр команда булып тупланды һәм уенны башлап җибәрде. Уен барышында уенчылар тәмле сый-хөрмәт, чәй, кофе белән сыйланып торды. Өйлә намазыннан соң нәтиҗәләр ясалды. Нәтиҗәләр шундый:
1-нче урынны – Адав-Толымбай командасы;
2-нче урынны – Буа электр челтәре командасы;
3-нче урынны – Буа мөхтәсибәте командасы яулады.
Ахырдан мөхтәсибәт исеменнән кубок һәм мактау кәгазьләре таратылды.
Буа мөхтәсибәте ошбу чараны үткәрергә ярдәм кулын сузганнары өчен төп иганәчеләргә: “Батыр” спорт мәктәбе мөдире Гобәйдуллин Альберт Завид улына, Сабирҗанов Илфат Искәндәр улына; шәхси эшмәкәрләр: кибет мөдире Камалов Илнар Иршат улына, “Добрый” кибет мөдире Хәйруллин Рамилгә, “Корзинка” мөдире Фәхретдинов Фәнил Гарәфетдин улына олы ихтирам һәм рәхмәтен җиткерә.
Катнашучылар Буа мөхтәсибәтенә, оештыручыларга: “Безгә иң мөһиме булган аралашуны бүләк иткәнегез өчен рәхмәтләребезне җиткерәбез”, – диделәр.
