Мөфти Үзбәкстанга эшлекле сәфәренең соңгы көнен янә бөек шәхесләрнең каберләренә зиярат кылып үткәрде. Россиядән килгән бер төркем дин әһелләре белән бергә Камил хәзрәт Сәмигуллин Бохарада ислам тарихында тирән эз калдырган галимнәрнең истәлегенә дога кылды. Алар арасында: Нәкшебәндия тарикатенең остазлар чылбырында унберенче урында тора торган Ариф Əр-Ревгарий (куддиса сирруху), Нәкшебәндия тарикатенең остазлар чылбырында уникенче урында тора торган хуҗа Мәхмүд Əнҗир Фәгнави (куддиса сирруху), Нәкшебәндия тарикатенең остазлар чылбырында унөченче урында тора торган хуҗа Али Рамитаний (куддиса сирруху) һәм Нәкшебәндия тарикатенең остазлар чылбырында ундүртенче урында тора торган Мөхәммәд Баба Саммаси (куддиса сирруху). Моннан тыш, бөек ислам галиме, остаз шәех Мөхәммәд Баһаветдин Нәкшбанд (куддиса сирруху): "Кем мине зыярат кылырга тели, башта әниемне зыярат кылсын", - дип әйтеп калдырганча, галимнең анасының каберен дә барып күрделәр.
