Бүген Камил хәзрәт Сәмигуллин Татарстан мөселманнары Диния нәзарәтендә Ханты-Манси автономияле округы мөфтие Таһир хәзрәт Саматовны кабул итте. Татарстан мөфтие мөхтәрәм кунакны нәзарәтнең рухи мирасны торгызу, милли кыйммәтләрне, татар телен саклау һәм үстерү буенча алып барган эшчәнлеге белән таныштырды. Аерым алганда, мөфти хәзрәт “Хозур” нәшрияты бастырып чыгарган китапларны күрсәтте һәм “Хозур ТВ” телеканалы турында сөйләде.
Әңгәмә барышында Таһир хәзрәт Саматов татар дин әһелләре мирасына зур әһәмият биргәне өчен Татарстан Республикасы мөселманнары Диния нәзарәтенә рәхмәтен ирештерде. Шулай ук 2018 елда Габделхак хәзрәт Саматов укуларын оештыру мәсьәләләре буенча фикер алышу узды.
