Шәүвәл аеның 14 нче көнендә Татарстан мөфтие Ютазы районына эшлекле сәфәр кылды. Сәфәр барышында Камил хәзрәт Сәмигуллин район башлыгы Рөстәм Нуриев белән күреште. Очрашу вакытында Татарстан мөселманнары башлыгы район җитәкчесе белән төбәктәге дини вәзгыять буенча фикер алышты.
Мөфти катнашында очрашулар Урыссуның “Фәнис” мәдрәсәсендә дәвам итте. Биредә Камил хәзрәт Сәмигуллин мәдрәсәнең көндезге һәм читтән торып уку бүлеге шәкертләренә дипломнар тапшыру тантанасында катнашты. Быел мәдрәсәне тәмамлаучылар рекордлы санда булуы белән үзенчәлекле иде: “Фәнис” мәдрәсәсен 2018-2019 нчы уку елында барлыгы 69 чыгарылыш шәкерте бетерде. Мөфти хәзрәт чыгарылыш шәкертләренә үзенең ихлас теләкләрен, нәсыйхәт сүзләрен җиткерде: “Киләчәк хезмәт юлыгызда һәм тормышыгызда алган белемнәрегезне нәтиҗәле файдалануыгызны телим. Раббыбыз ныклы иман, бәрәкәт һәм тәүфикъ бирсен!”
Алга таба күркәм вакыйгалар Ютазы районы Бәйрәкә авылында дәвам итте. Биредә мөфти Камил хәзрәт Сәмигуллин һәм аның беренче урынбасары Рөстәм хәзрәт Вәлиуллин яңа мәчетнең нигез ташы салыну тантанасында катнашты. Авылда яшәүче дин кардәшләребезнең сөенечен бүлешергә шулай ук район авылларыннан да имамнар җыелган иде. Мөфти барлык катнашучыларны сәламләп, тәбрикләү сүзләрен җиткерде, районның дини тормышында актив катнашкан өчен район башлыгы Рөстәм Нуриевка Татарстан Республикасы мөселманнары Диния нәзарәтенең рәхмәт хатын тапшырды. Аннары әлеге тантанага килүчеләр “Гобәйдия” музеенда булды, иске зиратта сакланып калган элекке каберлекләрдә дога кылды. Катнашучылар тарихи җирлектә күргәннәренә соклануларын белдерделәр, күркәм эшләрнең дәвамлы булуын теләделәр.
yutazy.ru сайты фотолары файдаланылды.
