Бүген, сафәр аеның 12нче көнендә (16нчы августта), “Кол Шәриф” мәчетендә “ДУМ РТ Хаҗ” генераль директоры Ранис Вахитов Согуд Гарәбстаны Туризм идарәсеннән килгән кунак, Россия һәм Бәйсез Дәүләтләр Берлеге (БДБ) илләре буенча җитәкче киңәшчесе Абдул Кадыйр Мөхәммәд Хәмис белән очрашты. Очрашуда шулай ук Татарстан Мөфтиенең мәгълүмати сәясәт буенча урынбасары, “Хозур” нәшрият йорты җитәкчесе Ришат Хәмидуллин катнашты.
Республика башкаласына эш сәфәре кысаларында кунак Татарстан Республикасы мөселманнары Диния нәзарәте эшчәнлегенең төп юнәлешләре белән танышты. Ришат хәзрәт Татарстан мөселманнары Диния нәзарәте һәм аның карамагындагы оешмалар эшчәнлеге, төп проектлар һәм юнәлешләр, шулай ук татар халкының бай дини мирасы хакында сөйләп узды.
“ДУМ РТ Хаҗ” генераль директоры Ранис Вахитов кунакка төп эшчәнлек, шул исәптән хаҗ һәм гомрә оештыру хакында таныштырды.
Очрашу барышында катнашучылар төрле мәсьәләләр буенча фикер алыштылар һәм киләчәктә хезмәттәшлек итү мөмкинлеге хакында сөйләштеләр.
Очрашу тәмамлангач, катнашучылар бүләкләр алышты.
