ТР МДНнең “Зәкят” хәйрия фонды һәм дәгъват бүлеге хезмәткәрләре балалар хосписында булдылар. Ата-аналар соравы буенча Марсель хәзрәт Мингалиев догаларны уку хакында вәгазь сөйләде. Хәзрәт барлык сорауларга җентекләп җавап бирде. Шулай ук ул Аллаһы Тәгаләнең нигъмәтләре, ахирәт, фәрештәләр, җеннәр хакында җиткерде. Аннары бер ананың үтенечен тыңлап, яшәү белән үлем арасында калган яман шеш авырулы малай янында булды. Хәзрәт аның янында Коръән аятьләрен укыды, матур сүзләрен әйтте. Баласының рухи халәтен яхшырту теләгеннән палатага имам керүен теләгән әни кеше соңыннан сабые йөзендә елмаю күреп, үзе дә бик шатланды.
Мөфтият хезмәткәрләре хоспистагы барлык балаларга күчтәнәчләр өләштеләр.
