"Мәрҗани" мәчете каршында “Балалар” үзәге эшли башлый

25 октябрь 2013 ел 09:40

Казанның Мәрҗани мәчете карамагында эшләп килүче “Балалар” үзәге 3-4, 5-7 яшьлек балалар өчен ярты көн эшли торган төркемнәр ачылу турында хәбәр итә. Төркемнәр иртәнге сәгать тугыздан алып көндезге сәгать өчкә кадәр эшли.

Әлеге төркемнәрдә дини белемнәр бирелә, тәрбиячеләре белән уеннар алып барыла. Малайлар өчен – дзюдо, кызлар өчен “Остабикә” түгәрәкләре эшләячәк.

 Балаларга уен рәвешендә пәйгамбәрләребез тарихы, әдәп-әхлак дәресләре, классикларыбызның әсәрләре, әкиятләр, шигырьләр биреләчәк. “Монда гарәп теленә, Коръән ятларга да өйрәнәләр. Шулай ук ашау-эчү әдәпләре, бәдрәфкә керү-чыгу, тәһарәт алу, намаз уку тәртибенә дә өйрәтәчәкләр”, - дип белдерде “Татар-информ” мәгълүмат агентлыгы хәбәрчесенә төркемнәрне оештыручыларның берсе Алсу Хафизова.

Биредә татар телен дә тирәнтен өйрәнергә ниятлиләр.“Ата-аналар матур әдәби телдә сөйләшергә сусаган. Монда матур әдәби телгә өйрәнү өчен, мәсәлән, күнекмәләр ясаганда алар шундый шигырьләр алалар яки, аерым утырып, шигырьләрне матур, дөрес итеп укыйлар. Шулай итеп, бу аларның хәтеренә кереп кала”, - диде ул.

“Үзәкне оештыру идеясе ничек туды?” дигән сорауга Алсу Хафизова идеянең Мәрҗани мәчете имам-хатыйбы Мансур хәзрәт Җәләлетдиновкы икәнелеген, ә үзенең оештыру эшләрендә итүен белдерде. Мансур хәзрәт: “Аның финанс яктан да, мораль яктан да ярдәме белән, әлеге идеяне тормышка ашырабыз”, - диде.

“Татар-информ”, Римма Гатина

Намаз вакытлары

Иртәнге намаз
Кояш чыга
Өйлә намазы
Икенде намазы
Ахшам намазы
Ястү намазы
Яңалыклар архивы
Tatarstan.Net - все сайты Татарстана