Милләт һәм дин өлкәсендә, шәхси мәнфәгатьне алга сөргән сәяси уеннар күп барса да, гади мәхәллә-мәчет, мәдрәсә тормышы үз агымы белән бара. Казанның Ислам динен кабул итүгә 1000 ел исемендәге мәдрәсәсендә дә милли-дини тормыш нәтиҗәле бара. Әниләр көне уңаеннан, мәдрәсәгә мөслимә әниләрне җыйдылар.
Кунакка килгән мөслимәләрнең уллары мәдрәсәдә белем ала. Чараны оештыру мәдрәсә ректоры Ильяс хәзрәт Җиһаншин башына килгән. Аның сүзләренчә, мөселманнар дөньяви бәйрәмнәрдән читтә кала алмый. Әмма аларны ислам рухында уздырырга кирәк. Мисал өчен, алар Әниләр көне бәйрәмен Коръән укып, дога кылып оештырдылар. Намаздан соң, кунакларны урамда пешерелгән пылау белән сыйладылар.
Әниләргә мәдрәсә хезмәткәрләре бүләкләр дә тапшырды. Аларны өч бала әтисе Фәрит Мифтахов әзерләгән иде.
Тимер Сәгыйтов
Чыганак: www.tatar-islam.com
