Пәйгамбәребез Мөхәммәд (сгв) бер хәдисендә: “Изгелек кылуда ярышыгыз”, – дип әйткән. Хәзерге вакытта изгелек кылучы кешеләр юк түгел, алар һәр матбугат чарасында диярлек яктыртылып тора. Бу күренеш, әлбәттә, безне куандыра. Әмма дә ләкин, як-ягыбызга карасак, безнең ярдәмгә мохтаҗ булучыларның саны шактый күп булып кала бирә.
Шуны раслап, “Выбор” исемле оешма ТР буенча Эчке эшләр министрлыгының мәдәният үзәгендә “Ят бала була алмый” исемле хәйрия концерты оештырды. Чарада танылып килүче җыр-бию коллективлары чыгыш ясады. Араларында – «Шәрык» клубында барлыкка килгән Аxelle исемле рэп төркеме дә бар иде. Чара барышында җыелган акчалар әллә ни күп булмаса да, алар гарип балаларга коляскалар алырга тотылачак. Битараф булмаган яшьләр күбрәк булса, киләчәгебез тагын да яктырак булыр иде дип ышанып калабыз. Яхшылыклары үзләренә меңе белән әйләнеп кайтса иде.
Ләйсән ГОБӘЙДУЛЛИНА,
КФУның журналистика һәм социология факультеты студенткасы
"Дин вә мәгыйшәт" газетасыннан
