Камал театры Туфан Миңнуллинның "Мулла" әсәрен әзерли. Спектакль 7 ноябрь - режиссер Марсель Сәлимҗановның туган көнендә күрсәтелә. Әсәр Туфан Миңнуллинның якты истәлегенә багышлана.
"Мулла" әсәрен Әтнә, Минзәлә, Уфа театрлары куйды. Ләкин Камал "Мулла"сын башкаларыннан аерылып торачак. Реҗиссер Фәрит Бикчәнтәев ышандырганча, алар муллары көрәшче итеп күрсәтәчәк.
"Сөләйман" мәчете имам-хатыйбы Илдар Баязитов фикеренчә, театрларда дин әһелләрен уңай итеп күрсәтү, аларның халык өчен эшләгән хезмәтләрен тану шатлыклы күренеш. Бу җәмгыятьтә дин әһелләренең әһәмиятен тану да булып тора. - Совет чорында дин әһелләрен көлү объектына әйләндерелде. Бу күренешләр әле дә бераз дәвам итә. Камалда уңай мулланы күрсәткән "Мулла" спектакле куелуы, һичшиксез, дин әһелләренең халык арасында дәрәҗәсен күтәрүгә үз өлешен кертәчәк. Моның өчен Камал театры коллективына Аллаһның рәхмәте! Чөнки халыкның бер өлеше муллаларга совет чорындагы кебегрәк карый. Күпчелек дин әһелләре халкыбыз иманлы, инсафлы булсын өчен тырыша-, ди Баязитов
Мулла ролен яшь артист Эмиль Талипов башкарачак.
Тимер Сәгыйтов
Чыганак: tatar-islam.com
