Яулык ябарга карар кылгач та, төрле фикерләр ишетергә туры килде. Кемдер Мәскәүдәге хәлләрне, яулыклы кызларны террорчылар белән тиңләүләрен, яулыклы кызларга кырын карауларын төрттерсә, кемдер эш табу проблемасы, кемдер тормыштан ерагаю, читләшү булачагы белән куркытты. Алай гына да түгел, матбугатта да еш язып торалар: имеш, яулыклы кызларга җәмәгать транспортында да усал карыйлар, урамда үтеп барышлый теләсә ни әйтеп китәргә дә мөмкиннәр. Адым саен, шикләнеп, документларыңны тикшерергә мөмкиннәр, дусларың читләшәчәк, йомык тормышта калачаксың, имештер.
Ни кызганыч, бүген безнең әти-әниләр, абый-апалар, эне-сеңелләр исламны әнә шулай күзаллый, диннән һәм мөселманнардан курка. Террор галәмәтләреннән соң исламга карата тискәре мөнәсәбәт дулкыны килү дә эзсез калмады.
Ләкин, җәмәгать, тирәнрәк уйлап карасак, гаеп үзебездә дә бар. Ислам диненең яктылыкка, белемле, актив, югары әдәпле, ачык йөзле, киң күңелле булуга чакырганын үзебез дә еш кына онытып җибәрәбез. Яулыклы кызларыбыз кара киемнәр киеп, аяк асларына карап, башларын иеп йөргән вакытта, мөселман егетләребез һәр нәрсәдә ширек, бидгать эзләп интеккәндә, янәшәдәге дусларыбызда ислам диненә карата нинди мөнәсәбәт туарга тиеш соң?
Ак яулык, алсу күлмәк киеп, ачык йөз белән атлап барган мөселман кызын күргәч, җәмәгать исламның кара киемнәргә төренеп йөрергә кушмавын, киресенчә, ачык-якты булырга дәшүен аңлар, әйләнә-тирәдәге кешеләргә ярдәмгә ашыгучы, ачык йөзле мөселман егетләрен күреп, башкалар динебез турында да яхшыны гына уйлар иде.
Хөрмәтле дин кардәшләрем! Мөселман кешесенең һәр гамәле һәм тышкы кыяфәте, сүзләре дә дәгъвәт икәнен онытмыйк. Дәгъвәтебез уңай, исламга карата позитив фикерләр уятырлык булса иде.
Матур итеп яулыгын бәйләгән, пөхтә итеп киенгән мөселман кызларын күргәч – шундый булырга телим, дип хыяллана идем. Аллага шөкер, хиҗап кигәч дусларым да кимемәде, кырын караучыларны да күрмәдем, сүгеп-ачуланып узучыларны да очратмадым. Транспортта да төбәлмиләр, урамда да бәйләнмиләр. Әгәр культуралы итеп киенсәң, үзеңне әдәпле, итәгатьле тотсаң, нигә бәйләнергә тиешләр соң әле?
Барысы да үзебездән тора: адымнарыбыз ышанычлы, күңелләребез киң, йөзләребез ачык, киемнәребез пөхтә-матур, белемебез бай, эшләребез файдалы-мәгънәле булсын. Шул вакытта беркем дә ислам дине ябык тормышка, караңгылыкка илтә дип әйтмәс, динебезгә каршы килгән террор галәмәтләрен кылучы гөнаһлы бәндәләр белән безнең арада охшашлык тапмас, күңеленә шик кермәс, хакыйкатьне аңлар, Инша Аллаһ.
Ләйсән ФӘТХЕТДИНОВА,
КФУ студенты
