Чаллыда фәнни-гамәли семинар узды

09 декабрь 2019 ел 14:36
Чаллыда фәнни-гамәли семинар узды

Чаллы шәһәренең “Ак мәчет”мәдрәсәсендә ислам динен пропагандалаудан тыш, халкыбызның милли аңын үстерүгә багышланган чаралар да еш үткәрелә.Узган ел нәсел шәҗәрәләрен төзү-өйрәнүгә багышланган төбәкара конференция катнашучыларда зур кызыксыну уятканлыктан, быел аның статусын күтәреп, Рәсәйкүләм фәнни-гамәли семинар үткәрергә булдылар. “Татар халкының рухи традицияләрендә нәсел тамырлары һәм төбәк тарихы” дип исемләнгән бу чара 7 декабрь көнне мәчет бинасында үтте. Коръән аятьләре, Кама буе төбәге казые, “Ак мәчет”нең имам-хатыйбы, мәдрәсә директоры Рөстәм хәзрәт Шәйхевәлиевның кереш сүзе һәм шәһәребезнең имам-мөхтәсибе Әлфәс хәзрәт Гайфуллинның фатихасы белән актлар залында башланып киткән семинарның пленар утырышында Казаннан килгән күренекле галимнәр филология фәннәре докторы, профессор, академик М.Х. Бакиров, филология фәннәре докторы, профессор, халыкара “Тюркологик тикшеренүләр”журналының баш редакторы Ф.С. Хәкимҗанов, тарих фәннәре докторы, Казан федераль университеты профессоры Г.М. Дәүләтшин халкыбызның тарихы һәм рухи традицияләре турында тирән эчтәлекле докладларын укыды.

Өйлә намазыннан соң, семинар үз эшен өч секциягә бүленеп дәвам итте. Чыгыш ясаучылар арасында Казанннан, республикабыз районнарыннан, Башкортостаннан, Киров өлкәсеннән килгән мәдрәсә мөгаллимнәре, имам-хатыйплар, Чаллы дәүләт педагогика университеты укытучылары һәм студентлары, “Ак мәчет” мәдрәсәсе мөгаллимнәре һәм шәкертләре бар иде. Барлык чыгышлар да зур игътибар һәм кызыксыну белән тыңланды. Тәнәфес вакытларында кунаклар мәдрәсәдә оештырылган”Татар ислам мәгарифе” музее белән дә таныштылар.

Йомгаклау утырышында Рөстәм хәзрәт, педуниверситет доценты Р.И. Хаҗиев һәм секция җитәкчеләре семинарда укып-тикшерелгән докладларга анализ ясады. Кунаклар һәм катнашучылар, семинарның бик югары дәрәҗәдә оештырылуын билгеләп, “Ак мәчет” җитәкчелегенә рәхмәтләрен җиткерде, бу чара традициягә әйләнеп, ел саен үткәрелсен иде дигән теләкләрен белдерде, семинар материалларын аерым китапка туплап чыгару хәбәрен шатланып кабул итте.

Сурәт - 1
Сурәт - 2
Сурәт - 3
Сурәт - 4
Сурәт - 5
Дин әһеле
1992 -1998 елларда
Дин әһеле
1998 - 2011 елларда
Дин әһеле
2011 – 2013 елларда
Дин әһеле
2013 елның 17 апрелендә сайланды

Намаз вакытлары

Иртәнге намаз
Кояш чыга
Өйлә намазы
Икенде намазы
Ахшам намазы
Ястү намазы
Яңалыклар архивы
Tatarstan.Net - все сайты Татарстана