16 июнь көнне Әбү Хәнифә мәчете Резидә ханым җитәкчелегендә “Ислам тәлгәшләре” төркеме кунакларына үзенең ишеген ачты. Мәскәү, Казан, Ульян өлкәсе, Теләче, Саба, Питрәч, Яшел үзән, Буа районының Әнкәбә, Исәк, Әлки, Тәүгелде, Яңа Тинчәле авыллырыннан килгән тәлгәшләр мәчетнең уңайлылыгына, матурлыгына хозурландылар, үзләренең бүләкләрен тапшырдылар. Мәчет намазы укыганнан соң, мул табын артында мәчет имам-хатыйбы Шамил хәзрәт “Ислам тәлгәшләре” төркеменә үзенең җылы рәхмәт сүзләрен ирештерде.
Районның мөслимәләр оешмасы җитәкчесе Шәйдуллина Гөлирә ханым оешманың эшчәнлеге белән таныштырды, ел әйләнәсендә нинди чаралар үткәрелүе турында сөйләде. Бер-берсен телефон аша гына белгән ханымнар үзара аралыштылар, фикер алыштылар. Казан шәһәрендә яшәүче Гүзәлия абыстайга Рамазан аенда үткәргән дәресләре өчен Буа мөхтәсибәте исеменнән рәхмәт хаты тапшырылды.
Өйлә намазы укылганнан соң Коръән укылды һәм мөнәҗәтләр әйтелде. Кунаклар үзләренең олы рәхмәтләрен әйтеп таралыштылар. Шундый күркәм җыенны үткәргән өчен мәчеттә көч куйган хуҗабикәләргә олы рәхмәтләрен җиткерделәр.
