Татарстанда III Халыкара KAZANHALAL–2012 күргәзмә-ярминкәсенә әзерлек эшләре дәвам итә. Быел әлеге чара тагын да масштаблырак һәм кызыклырак булырга ошаган, дип яза www.intertat.ru сайты.
Күргәзмә 19-21 май көннәрендә KAZANSUMMIT–2012 ислам бизнесы һәм финансларының IV Халыкара саммиты кысаларында үткәреләчәк. Чарада катнашырга теләк белдерүчеләр арасында хәләл ризык җитештерүчеләр генә түгел, ә косметика, милли һәм мөселман киемнәре, әдәбият, сувенирлар сату белән шөгыльләнүчеләр, шулай ук туристик һәм медицина хезмәте күрсәтүче оешмалар да бар.
Чараның төп максаты – халыкны үзебездә һәм чит илләрдә җитештерелүче сыйфатлы хәләл ризык белән таныштыру. Халыкка әлеге продуктларның хәләл икәнен генә түгел, ә экологик таләпләргә туры килә торган, сәламәтлек өчен файдалы азык-төлек икәнлеген аңлату да төп бурычларның берсе. Тик шунысын да онытырга ярамый: хәләл дигәндә ашау продуктларын гына түгел, ә финанс, медицина, туристик хезмәтләрне дә күз уңында тотарга кирәк.
Тагын бер мөһим нәрсә: «KAZANHALAL»нең оештыру комитеты Малайзия, Һиндстан, Индонезия, Пакыстан, Төркия һәм БДБ илләре белән тыгыз элемтәдә тора. Шул рәвешле, бу чара Россиянең гарәп илләре белән хезмәттәшлеген ныгытуга зур өлеш кертә. Быел әлеге күргәзмә-ярминкәдә йөз иллегә якын компания-экспонент катнашыр дип көтелә.
Рәмзия ЗАКИРОВА
«Дин вә мәгыйшәт» газетасыннан
